DUHTAK JOHAN CP-2

DUHTAK JOHAN CP-2 

ZIAKTU MALS RALTE

Min star tih hi a sawi ngun ve reuh bawk si a, Johana tak phei chu tunge anih leh khawi veng nge tih tak ngial pawh ka hrelo . Tuna a thil sawi status chu ka en ve chhin a, alo hmang tak tak bawk.

A hla hman tel kher la chu ka nui ati za ang reng mahse ka reply duh lem lo, "Khawi veng ami nge a?" Tiin Joseph-a chu ka zawt a, reilo te ah min lo chhang let thuai bawk. An veng awmna min hrilh chuan kan in hlat nasa mai,  lo in ngaizawng ta ang pawh ni ila kan in hmu vak vak thei pawn ka ring lo te ka tia.

December ni 13 ani a, ka pian cham a thleng ve tep tawh, ka kum 20 na tur ani a, lawm ka tum ve tak na in , thiante leh Cousin ho a, lawm vel mai mai ani mai ang chu . 

Vawiin tlai lam ah, Cindy nen len kan tum a, kan veng bul lawk a, Park ve deuh reuh , sawrkar ta ani a, Hostel , Thil training na  leh Guest house vel a awm nghe nghe, a hmun a nuam in, hun awl kan neih apiang hian kan han leng thin a, tlai lam ni tla tur thlir nan hmun duhthusam ani. 

Taxi la in kan lenna tur lamah chuan kan tlan a, Cindy chuan Taxi driver chu a be siam siam reng a, kan in an loh na lai tak ani, ani chu a tawng duhin tupawh mai hi a nel nghel a, puitling ti ti pui pawh a thiam , keichu ka hmelhriat loh lakah chuan ka tawng mawh khawp mai a, mahse hmel hlim lo leh nel awm loh deuh erawh chuan ka awm ngai bik chuanglo, ka be hmasa lo tih mai chauh ani.

Kan lenna tur hmun kan thlen chuan ni ala sa ang reng a, daihlim lai ah thu in, kan thil ei tur ken pah chuan kan titi vel mai mai a, Ka thiannu chuan Johana chanchin min zawt a, sawi em em tur pawh ka hrelo, kan in be ngai lem lo a, mak ve deuh chu min star tih a thianpa in min hrilh a, ani pawn status ah kan thlalak a hmang a, mahse min lo be chhun zawm miah loh hi mak ka ti , min lo bia se ka tihna erawh ani Chuang lo.

Tlai dar 3 leh tih ah chuan Trainer ho hnam dang ho chu an lo chhuak diah diah a, Bulding pathumna ami te ho an ni nghe nghe naga emaw , Manpuri vel an nih ka ring, Mizo hmel erawh an pu deuh vek a mahse hriat hran chu an awl .

Kan thutna lai tak chu a nuam lai tak leh view pawh nuam lai tak ani a, inleng satliah kan ni a, zirlai lo kal te chuan lo thut an chak tih kan hre reng tak na in, kan kian duh bik hauh lo, an ni chu nitin an thu thei a, keini te chu a chang zeuh zeuh bakin kan kal hleinem le.

Kan awmna lai vel chu video in thla ka la a, WhatsApp Status ah ka hmang ve zuai a,  mahse rin loh lutuk in Johan'an alo reply ve teh khiah mawle, "Ava nawm hmel" tiin , ka hmu reng tak na in ka chhang duh lawk lo a, Cindy-i  chuan "reply ve hrim hrim rawh, amah hi zeilo chi nih duh hmel , a tawng tlem hmel bawk sia lo in ngaizawng ta ang pawh ni hla nangman titi i khuh hawn hmasak zel a ngaih ka ring" tiin min nuih zui ruh ruh a, ka lo ner nang nang mai.

"Nuam lutuk" tiin ka chhang a, "umm" tiin min lo chhang let nghal vut a , 

Mahse chutianng chu chhan let dan tur ka hre tawh tlat lo chuvangin ka chhang tawh lo law law mai ang.

Ni a tla tep tawh a, haw kan tum hnai tawh, kawl a ni tla tur chu a mawi hliah hliah hi ani tawp mai, chhum senno chuan ati nalh leh zual a, van dum pawl thiak kak leh chhum senno chu inhmeh tak ani, thla ka lak sak mawlh mawlh mai!!

Haw lamah chuan ,  ke in kan haw a, kan veng atangin a hla lem lo bawk a short cut a awm a ta tang chuan minute 20 kal vel lek anih ka ring; 

In kan thlen chuan ka inbuak a ka nu rawngbawl ka pui ve nghal thuai bawk, kan in peih meuh chuan Carnival lamah kal leh ka ngai der tawh a, Zanin chu ka peih lo khawp mai, ka chau vawiin lam kan chhuahna anih ka ring.

Cindyi pawh keimah ang tho in alo peih lo ve a, kan duh dan tak phei chuan ai kal re ruat kan duh a, mahse hotu te lam khan an phal kan ring chiah bawk si lo , leh hlawh a tha ve ang reng bawk sia, kan ui tho bawk si a, chau vak lo ila chu kan phur leh hawrh tho in nia ka rin ni.

Peih lo chung chung chuan Carnival lamah chuan kan kal leh a, Gate pawn ah hian dawr thar an lo siam a, Drinks leh Momo tih ang reng vek ani, Mizo nula pakhat leh tlangval pahnih vel hi an lo thu bawk a, chu mi te chuan min hmuh vel ah min lo ko a ka hming lam in, min hria a mawn le, keichuan ka hre lem lo.

"Hka ka nia, hei kan thiannu dawr min lo dawr ve ula" tiin alo nui vur vur a, chupa chu ka hmuh tawh hnu ang ka ti, a sam a sei a, a hnar chu a lian lam lek lek maithei, a nui deuh sung reng a zu rim a nam deuh bawk.

Hmeichhia lo awm chu hmeichhe sam rawi hmeltha zet mai hi ani, alo nui ve ver ver a, "nia...min lo dawr ru" alo ti nghal zat bawk.

"Uii...ha banah kan lo dawr ang che u aw, pawisa kan keng miah loa " ka tih chuan an lo rem ti khawp mai a, min hre nel deuh te pawh an ang.

Gate kan luh chuan Cindyi chuan "kha pa kha, Johana thiante zing ami kha nih kha" alo ti a, alam ka hawi nghal vut mai , "ani maw ?! Ka hmuh hnu ang ka ti reng a, mahse ka hre chhuak zo lo a" ka tih chuan , hrechiang intih hmel zet hian  a mit chu a ti zim san a "ka hmu lawm, a bula lo thu ve tho mipa pawh kha ka hmu, Kan veng mi pawh an ni si lo a tinge hetah daih daih dawr an lo siam le hmeichhia pawh kha kan veng mi anilo" ati leh nghat nghat a, kei ka lo bu nghut nghut thung.

Kan Duty na ve ve turah kan phei chuan mi an la awm vak lo a, a vawt bawk si a, a khat tawkin vai ho Restuarant an siamna hmun a an gas thuk bulah chuan ka va ding thin a, tlem in a lum deuh ve deuh a, chu mi Resturant dawr a thawk pakhat la chu mizo tawng thiam tak tak si lo hian 

"Enga ti nge" tih te hi a sawi reng leh nghal a, ka lo nui leh ringawt thin, mi hi an in ti hmelhriat ve tawh a, Customer pangai ai pawn Egg roll te hi min pe tlawm zawk thin.Mahse Vai na na na chu nel chin tawk thiam a ngai an mawl tlat thin a.

Ka chauh vang nge, hun chu a kal deuh zung zung a, kan veng Mipa Duty ve ho lo kal kuan chhen ho chuan min lo be leh thin a, an ni Mipa ho erawh buaina siam an awm leh awm loh en fiah tur te an ni thung a, Security ang deuh hi.

Kan veng Basketball khel thin ho an ni a, an club sum tuak nan ti a lo in hlawh ve an ni nghe nghe, 

An zingah hian min duh ve deuh tu pakhat a awm a, Alu roll te hi min lo lei sak leh zeuh zel a, leh lamah chuan chaw ei puar hman lo te a kal kan nih thin vang hian a lawmawm ang reng.  Lalfamkima ania , Kima kan ti mai zel a, amah phei chu hmeltha ve deuh mai hi mawle, min duh tih ka hriatna rei tawh, amah pawh hian a in zep Chuang hlei lo a.

Mahse bialpa tur ang khan ka en theilo a chhan pawh, kei ai a thla chauhin a upa a, ala puitling lo ve bawk si a bialpa tan chuan ala nau ka tih vang.

Ban dawn ah chuan Hlawh min pe leh thlap a, Gate pawn kan chhuak chiah ti ah ka mi hmuh te vang chuan ka ham haih ang reng . Johana te leh Joseph-a te ho an ni a, an bulah chuan midang pawh an lo awm ve nual bawk, "hei an lo lang ve mai alawm" lo ti tu chu ka hriat ngai mi ani lem lo, vai hmel deuh ani a, mahse a ang lutuk hran lo, a mit meng leh a vun rawng chu thlahpawlh ani tih a hai theih loh thung.

Johana chu an thiante bulah chuan thu ve reng a, Hoodie nalh zet mai hi alo ha a, ka ta nen a in ang reuh em em leh nghal a, mahse a hnung lam ah keichu thil inziak a awm a, ani saw a awm ve leh ve loh ka hrelo.

Hoodie hi ka ngaina a, thlasik lai phei chuan ka ha reng zel. "Parte" ti a min lo au tu chu , Joseph-a ani a, zan tir khan kan lo dawr ang che u ka ti tawh bawk si a, Cindy-i nen chuan an dawr te awmna lamah chuan kan va phei ve mai bawk. Hmeichhia lo awm ve khan kan duh te min lo zawt a, a nui deuh sang reng bawk si a, a fel ngawtin ka ring . "Hei maw Johana chicks"  ehe mipa maw ka tia hmeichhia lek mawle, an bula awm ve sam tawi Mipa chiah chiah anih hi, avan mak em em , a aw chu a nu zân chuang lo na in, Patil pawh a ang lo, Mipa tak tak a ang. Cindy in ka kawr hnung lamah alo pawh zeuh chuan ani pawn Mipa emaw ati tho anih ka ring . Mipa a ang em atin ni .

Ka lo nui mai a, Johana chuan min lo en ve reng tih ka hmuh chuan engtin emaw ni hian kei mah ah tek deuh chhawk a awm, min star tih ka hre bawk si a, ka zak ve deuh hlek ani. 

"In alu leh papawr siam hi a tui hmel engzah man nge" Cindy-i chuan ati a, hmeichhia khan a man te hrilh in  an in lei sak a, Mipa lo awm ve ho chuan an ei ve chak thu an lo sawi a, an thiannu chuan a phal lo aniang a vin kha kha a, Cindy-i nen chuan kan lo nui kan lo nui ve mai.

Alu leh papawr chu a man ai tlawm daihin min pe a, Pani puri min la tem tir zui a, an thianpa in min star lo se chu kan ei kher pawh ka ring chuang lo, mahse an sual lem lo anih ka ring.

Johana kha a nui ve suk suk a, a nui lai ka hmuh lah khan an deuh mai a nei a, ka hrechhuak zo thlawt lo .

Tu emaw an deuh chu a nei chiang alawm. Hmanzan a ka hmuh pawh khan an deuh a nei ka ti tawh a, mahse ka hrechhuak zo lo anih kha , zanin a , ha lang thiau a anuih phei chuan an in ang leh zual mahse ka hrelo tunge a an.

Kan scooty dahna lam a kan kal lai chuan , Johan an min lo ko a, ka ding dat a, ka lo melh ve reng a, ka lam alo kal hnaih lai chuan, a rim tui in kah rim chu a nam deuh chem chem a, a nui suk a, biangsum ang deuh a nei a, mahse biangsum chu ani chiah lo mahse ka zep lem lo, a hmeltha ka ti.

Mipa hmeltha tih hi ka nei khat a, chhelo tih chu ka nei ve nual a, mahse hmeltha ti a sawi tur chu ka nei mang lo. Milar te an ni leh tawp a, Johana hi a hnai ah a hmeltha tih ka hrechiah , ka lo en reng vang nge , a hmai chu a khawih zawk a, ka lo hawi sawn vut thung.

"In haw tawh dawn em ni" tiin min lo zawt a, a aw ka hriat vawi khatna , e ani leh lo hmani zan khan "ka lawm e" atih tak kha, mahse a tawng zawi em a, ka hre leh tawh lo . "Umm...haw dawn chiah" tiin ka chhang ve mai a, Cindyi chuab Scooty dahna lam ah Scooty chu alo ti nung vat vat tawh a, 

Ka hma a ding pa la chu sawi tur a hre lo nge , min en a , a nui leh ringawt zel a, ka lo nui lo ve thei lo.

"Enge" nui chunga ka zawh chuan "i hmeltha em a" , uii ha deuh teh thlawt ah , hmai chhan a han sawi sawi tur min ti hrelo chuan , "nangpawh" ka ti ringawt a, ka thusawi in a thawng nge , min lo melh vut a, ka tawngsual tih ka hre chiah, "nangpawh i tha lawm, tu pawh hi an hmeltha vek a" bah deuh nak hian ka ti a, ka thusawi chu alo nuih pui deuh hak a, Chiang leh zualin keiin ka lo en thung.

Min star bawk si a, nakin a ka thiante bula ka sawi nan eng ang hmel pu nge anih tih fiah leh Chiang taka ka sawi theih nan uluk taka ka en hi a ngai.

Mahse le hepa hi a lai deuh tlat nia, 

Lai hma chi ani maw, ka nuih ta ringawt a, "Par...kan kal dawn ni a vawt e" kan hnung lam atangin Cindy-i chuan alo ti lang lang a, 

Hnung lam hawih ka bu zeuh a, ka hma lam ka en leh chuan "Ih..englo Parte" , "awihh enge" , ka nui deuh suk a, alo nui ve tho, a tawng thut bawk si a

"Bialpa i nei em?, emaw biak lai , nghah lai mek ang chi vel" , ati deuh nghut nghut a, a tawng a thum in a zawi ang reng si a, a thusawi lai chuan ka mit ah chiang takin min en rûn a, a mit hmul daih ani ka lo en leh tawh, a mit hmul chu hmeichhe mit hmul ni awm a mawi ani, a sei a, a tam bawk si a, a mit a nalh anih hi.

Aw alo thian kharh a, ka van han che nawi tak em! Enge min , zawh pawh ka hre leh tawh lo, Zothanphar che khawlo viau zel suh i che uih leh vek tawh ania, "eee..engtin maw" , 

"Bialpa i nei em" , "aih..nei miah nang" , "anih mi nghah lai emaw biak lai i nei em?" , lu ka thing mat mat a, 

Chutah chuan mawi fahran hian min nuih zui a, kan vawihnih inhmuhna chauh ani na in, ka mipa nel hma chi ani dawn aniang, a bulah khan enge maw hian min chen chilh ka sawi thiam chiah lo na in.

Hmeichhia chu , kan duh lo deuh ten min Duh tih min hrilh hian , kan ngei deuh tlat zel a, an bul hnai a awm pawh nuam kan ti lo thin , kan kim ki deuh ti ila ka sawi sual lo ang, Johana chu ka vawi hnih hmuhna ah pangai takin ka be thei a, mak ve tak chu ani.

Mi nel ka harsat teh lul nen.

"Anih kal tawh ru, a vawt bawk sia" tiin ka lu  ah alo  tuai a, ka en chho va mai, "anih aw" tiin ka thianu awmna lamah chuan ka phei a, lu a bu nghut a, a thiante ho awmna lamah chuan a phei ve leh nghal mai bawk.

Kan tlan chhuah rual chuan Cindy-i  chuan zawhna alo ngah khawp mai a, 

Ka chhang vek a, zep nei hauh lo in kan in biak dan kim chang chu ka hrilh thlap a, alo nui ruh ruh thung.

"I che nawi thei e, mahse a mah chu azia ka ti in inhmeh reuh tawp a, a sang bawk si a, a mah kha a cool deuh ruih bawk sia, en mai phei chuan hmeichhe hmuh thut han duh nghal tur chi ani pawn ka hrelo, mahse a duh ve tak tak che nih ka ring" alo ti nghut nghut a, a thusawi chuan enge maw ti zawng tak hian ka awm ati nuam rauh rauh a, eng rau emaw ni chuan min pawl chiang ani.

In kan thlen pawh chuan ka phur hawrh mai a, inbual na tur tui ka lum a, ka in peih meuh chuan Dar 12 ari dawn thuak tawh. Ka phone ka  en hmasa ber a, Johana message alo awm ngei bawk. "I thleng tawh em" tih te mai hi ani , "umm thleng tawh e, in la haw ve lo em ni?" tiin ka chhang let nghal thuai a, reuh tak ka nghak ve deuh a,  mahse min lo la reply mai loh avang chuan ka mu dawn emawni ka ti, chutia phone ka en mai mai lai chuan Joseph-an ti hian alo ti a

"Parte , Johana khan a duh ve lutuk che a, a fel bawk sia, ruihtheih thil pawh ati ngai lo, a sawi ve reng zel che a, bialpa i nei lo tiraw?" Tih chu ka chhiar nawn sek a, ka nui ver ver mai, "nei lo e" tiin ka chhang a, alo reply rang khawp mai, chutih laiin Johana khan ka message a en tawh a mahse min reply miah lo, a online kur tho sia.

"Ihh...alo bem dawn che a maw , lo ti beidawng suh aw" tih alo thawn chu ka tho chhuak hluai a, "awii...vawi hnih chiah ka la hmu a lo nihpui te chu ah ti awm ang lo" tiin ka chhang a, Mipa vawi hnih chiah hmuh chu pawh hmelhriat sa lo leh nghal ngaihzawng tur chuan Risk lak a ngai ang.Chuti ngawtin ka nihpui duh teuh lo mai aaah...

"Aww....in in hre chho zel mai dawn  alawm, a fel lutuk ania aw" alo ti a, a thianpa chu a fak ve nasa khawp mai, 

"In la awm khawm elaw?" , Emiji nui vak vak alo thawn a "12 rik tawh hi ka mu daih tawh, Johana chu alo be dawn che nia" alo ti leh a, ka reply tawh lem lo.

Johana Chat a ka luh chuan kan in biakna ka chhiar a , kan in be mang lo, alo typing tih ka hmuh rual in ka chhuak vat a, awi leh ka van seen nghal teuh ve, ka thin a phu dut dut leh nghal "Parte ila meng em" 

Hmmm ka online tih a hmu ve kur ang chu nge min zawh kher le, ka message mij reply lawk loh avang khan ka chhang let duh bik miah lo a Minute thum hnu vel ah ka la men thu ka va hrilh a, chuta athu  lo sawi chu a type rei ngaihtuah in a sawi tlem daih.

"Ihh" tih chiah hi Minute khat dawn a type anih chu mawle, Joseph-a khan min hirlh tawh tho a, tiin ka zahtheih loh chhuah in ti hian ka va sawi a, ka type lai te chuan ka nui ruh ruh a, a chhan chu ka uang pah deuh tlat a.

"Ka duh che a, min duh ve em tih i tum?" Ka va tih chuan , min chhang lawk lo mahse emoji nui lai lo hmang in "umm tiang kha" alo ti ve hram a, hepa hi a zakzum anih hi.

"Awi...ka hrelo le duh ringawt na tur a awm rih lo e vawi hnih vel chauh ka la hmu bawk che sia" , ka va tih chuan a type lawk lo a, sawi tur a hrelo anih ka ring. "Ni ve tho mai....." Alo ti a, chhan mai dan tur ka hre lo a Sticker nui huah huah lai hi ka va thawn ringawt s, chuta athu lo sawi chuan min thawng ang reng 

"Ka duh che a, ka keichuan vawi thum ka hmuhna che ni tawh" tih hi ani a, "engtik in nge vawi thum min lo hmuh hman bik a" ka va tih chuan,

"Hmani a hmuifang a in kal tum khan mawle, ka hmu tawh che a" alo ti a, 

Ehe min hmu maw ! tu kha nge le, mi kal kha an awm ve nual a, ni tak e... Joseph-a pawh khan min hmuh thu a sawi tak kha . Chuti anih chuan Johana pawh hi a awm ve tihna ani ngei ang. "Ka hmu ve lo che anih chu" , tiin ka chhang a . Sawi tur em em pawh ka hrelo min duh ringawt dan tur ka hre bawk si lo a, chumai bak ah eng ang mizia nge a nih tak ngial pawh ka la hrelo ania ka Bialpa tur ang pawh chuan ka ngaihtuah buai peih rih lo ka mu phawt dawn.

"Umm mu dawn hnai tawh em" , alo tih chuan ka mut tur thu in ka chhang nghal a, min muttui vel thlap hnu ah ka out a, mahse ka mut pah chuan ka ngaihtuah ve rauh rauh mai. Mipa hmeltha tak ani a, ka hnar phal kher ange maw ,mahse keichu rei deuh in zui ka duh bawk si a, ho te a inṭhen leh nghal tur ang kha chu ka peih lo law law.

Dar 2 rik dawn thleng pawh chuan ka muhil thei lo a, phone bawk chu ka en leh ṭhin a, Johana last seen pawh kan in biak zawh hnu lawk kha ani. Ka rilru chuan thil neuh neuh ka ngaihtuah a, ka risk pawp mai dawn mawnle, tih te thlengin ka ngaihtuah.Zan a rei tawh vang nge ka ngaih a sam ang reng hle tih chu ka hrechiang hle a, Johana hnen a Message ka thawn tur mawlh chu ka ngaihtuah ngut ngut a.

A thlalak engmah ka nei lo a, Dp ah amah a in hmang bawk si lo, Joseph-a Following chu ka va check chhin mai mai a, Johana chu ka hmu ngei a, min lo Follow tih ka hmuh chuan ka Follow back rang asin aw! ....Thlalak chu engmah a lo Post lo a , A Instagram Profile Picture ah erawh a hmel tlem tlem hman ve deuhna chu pawh engmah a chiang chuang lo, ka en nawn tluk tluk a.

Mipa Ṭawng tam lem lo tak ani tih chu ka hre tawh a, Josepha khan Ruihtheih thil pawh atih loh thu mij hrilh tak kha. Ka in ngaihtuah ka in ngaihtuah hnu ah, chhan na ka nei a, ala hma tih hre reng chungin Risk ka la mai ang tih chu ka thlutluk na ani ta ani. A mutthilh daih tawh ka ring tho na in , zing kar a , a hmuh tur tiin thu ka va thawn a "Johan, lo chhang ta che ila, keichu rei deuh inngaihzawn ka duh dawn a" tih hi ka va thawn a, ka thawn zawh rual rual chuan ka mur nghal sung sung thei.

Ka phone chu ka kut vei lamah kengin khum ah chuan ka ban ka phar hluai a, Phone lo vibrate chu Johana ani. Avan mengrei em em ! Chuan ka thil thawn pawh alo chhang a.

"Umm ka hrethiam alawm, keipawh ka peih ting tang lo" tiin Emoji nui hi alo hmang a, ka awm nawm loh a hlauh vang nge a khat tawk hian, Emoji nui lem hi alo hmang ziah mai .

Ka en a, ka chhan leh hma chuan message dang alo lut leh nghal a, "Ka Bialnu ini duh em Parte" alo tih chuan ka hit mup in ka hria, enge maw keimah ah hian danglam a awm, he mipa hi ka hmelhriat thin ani bawk si lo, mahse engtin emaw tak hian min hip lawi a, a thil lo thawn pawh chu chhan mai dan tur ka hrelo.

"Keichu ka sual a, ka khirh bawk asin" ka va ti ta ringawt a, dawt ka sawi lem lo bawk, "ka duh zawk" alo tih chuan ka nui suk a, puan sin that pahin ka mu rem sauh sauh a, ka hlim ru veng veng mai.

"Ka risk dawn che a, min duh lo leh si chuan , ka then hmak dawn che nia" ka va tih chuan , Sticker cute lutuk mai hi alo thawn a,  "Ka duh che lawm, nangmah tawp hi ka sawi thiamlo, ka duh chi" , uiii  ha ka lai vel anih chu, High school kal lai in ngaizawng tir te pawh kan ang alawm le kan in biak dan chu , a zangkhai in a hlimawm bawk si a, keimah te chuan ka nui ka nui a, ani pawh anih ve tho ka ring.

Kan in be rei khawp mai, kan duh zawng leh duh loh zawng te, kan sawi dun a, naupang chhia viau angin a lang a, mahse kan hlimpui phian a, Khawvar lam ar alo khuan rual chuan, Kan in Mangtha ve thei ta hram a, ka mut pawh a chhuak thei lo vel chu ani sia , ka van zaktheilo tak.

Mahse Johana chu , Ka mipa ngainat chi anih ka ring a, ka tihsual loh hram ka beisei, Cindy i ka hrilh hunah eng ang takin nge a ngaih ang aw min hau ang nge min lawmpui ang .

Ka thawh leh meuh chuan Chhun Dar 12 ari thuak tawh , ka nu in vawi enge maw zat min kaih thawh alo tum a, ka mu lui tlat thung a, ka tlaivar tih hria se chuan min lo tur chhen lo ang . Mahse ka duh chen chen ka mu tho a, hmai ka phih lai a ka in en chuan 

Bialpa ka nei tih ka hrechhuak a, ka nui vur vur a, ka nu in , "Nui vur vur Suh tih vat vat la, Chaw ei rawh i Putea ten Partei chu  Mas hma min lo awmpui lawk rawhse an tih kha Pocket money tur an pe dawn che niang" , alo tih chuan ka meng kawk a, "tak tak maw!!!?? yess!!! Ka phei nghal daw" , ka ti nghak chul a.

Ka nu chuan Chawhmeh min lo tihsat sak mawlh mawlh a, ka Putea te veng chu Saw lamah an awm a, ka phur viau nachhang pakhat pawh Johana te veng anih vang ni.Nizan khan an veng ka zawt a, ka putea te an awm tih ka hrilh nghe nghe.

END OF CP 2 

(A tawp lak lawh deuh a, tunlai Story ziah competition ah tel ve ka tum avangin, Hemi story tho hmang hian Short Story ka siam a, chu chu ka buaipui rih a, min lo hrethiam hram hram dawn nia)