YOU KNOW ME CP-1
YOU KNOW ME (YKM) CP-1BY : APHRODITE STORY
THU HMA
Ka story lo chhiar ṭhinte leh lo share ṭhinte in chungah ka lawm êm êm a min lo support ve ṭhin ula ....tun ṭum kan story khawih tur hi eng ang nge ka la hre chiah bik lova ka complete hun law law ah nge ni ang a ....ka zawh apiangin ka lo dah ang tih ka ngaihtuaha mahse hei tunah Cp1 na ka complete leh der tawha🤣 han ti leh dawn ila lo chhiar ve ngei ngei ang che 🖤
"Chutiang hre kil kel hman ka nilo tih i hriat kha Defne" atih chuan thawk ka la halha Kum 2 kan in zui tawha ka Allergy....Grape ah Allergy ka nei tih la hre miah lo tu chu ka melh tlawk tlawka "tikhan min en reng suh" alo tih chuan "i hmuhnawm êm a engtin nge ila hriat miah lo thei tih ka ngaihtuah mai mai mawle" tiin ka thaw haka nûr fê a min melh pawh chu hre awm ang pawhin ka awmlo "Defne" atih chuan ka melh ralha "Ka chhungten chaw ei turin an sawm che a " inthlahrun hmel taka atih chuan za vak lo hian ka nui suka "kan in ngaizawng tih i hrilh tawh em ni...? Nge ni a ṭhiang ang tho in ka lo kal dawn" ka tih chuan "hrilh ka tumna a rei tawh...mahse ka la sawilo zanah lo kal la i awm laiin ka hrilh ang ka buai thei" atih lai chuan ka lo pawt chat a "lawkin ka buai tih ṭawngkam kha chu hmang lo hrâm teh....in thawhpui te nena chaw in ei khawm ziah tih te chuan Nutei ...in in ah chaw alo ei tih te pawh ka hre vek alawm....chuan in in zui nasa tih pawh ka hriat loh ring suh" vin ang reng taka ka tih chuan hahthlak tih hmel deuh hian min en a "lo ngaihtuah la....in college banah ka lo lam ang che " aw dam thluama atih chuan "ka hman lo" ka lo ti chang faka "enge itih dawn" ......"sir Remtluanga te inah Kan Project tur kan lam dawn" ka ti a .
Engmah dang sawi lova Min melh reng lai chuan a phone alo ri a ka aw hriat ṭhin deuh hian alo be leh âl âl tawh Nutei ."Ka lo kal ṭep ..." tih chiah pakhat chuan a sawia a dah hmak a kei min lo en leh chuan ka lungawi vak lo tih a hmu thiam ngei anih ka ring ka lamah chuan lo kal in ka chair bul ah chuan a ṭhu a
"Anih chuan i hman hunah ani mai " ati a lu ka bu nghat ringawt . Ka kut alo vuana
"Defne ....nang lo chu tumah duh dang leh Hmangaih dang ka neilo tih i hriat kha Nutei emaw hmeichhe dang pawh ka tan chuan Kel ang bak an ni lo...nangte chu Beram ang i nia Lalṭhachiangi " tiin ka hnar alo khawih zeuha , ka nui leh ta nge nge
"anih kal rawh..." pangchang aw taka ka tih chuan lungawi tih hriat takin ka kut chu a fawp vang vanga a tho a ...Dawr chhung aṭang chuan a chhuak lai chu ka thlir renga lo hawi in kut alo vak lauh lauh a kan in vel liam hnu ah kan college lam panin ka pheia . Class ka luh chuan ni hmasa ber mah nise ka zam vak lo 3rd Semester ka ni ve tawh miaua ka ṭhiante ho an lo luh tak ṭak ṭak hnu chuan a bengchhenga kan titi mur mur bawk nen ṭawng ri lo chu hriat tur a awm lo.
"Kei chu ah ..Nutei ve khah ka mit thlawtlo
a over thei si Instagram ah pawh inpa nen an Pic a post nasat theih êm kha..i tuar thei zawk" Zautei ka ṭhianu chuan a ti hlarh hlarha "chu chu lawm...Soloa hi a fel ka ti dawn nge a mizia nen phei chuan a in mil lo hmeichhe hmelhriat lah hi a ngah zêk" nui hak hak chunga lo ti tu chu Puipuii .
"In sawi uar thei êm mai aw....a bialnu awm ve reng hi " Hruaian alo ti ve thunga , an sawi uar thei ania . Nutei hi Ka bialpa Solomon LalRinfela te sumdawn na a an model a pakhat ani a duhai nasa in an in zui nasa tih chu kei leh ka ṭhiante chauh lo kan in ngaizawng tih hre ho chuan an hre vek in ka ring.
Soloa te hi Aizawl ah chuan mihlun an ni a ...an khawsa thei hle a Mizoram a lirthei chhuak thar hi chu an Showroom ami deuj vek ti ila ka sawi sual tam lo ang kan inzui tih hi ka chhungte hian hre mahse mi hausa chhungkua an ni a kei ni ang han el phak chi zia zang an nilo tih hriain ka chhungte hian ṭhen turin min ti fo a kei hian ṭhen han tum ve viau ṭhin mah ila
aman a duh lo zela min Hmangaih thu leh nupuia min neih a tum ruh hle thu te hi min hrilh ve ṭhin mahse nuam lo tihna chin a awm lo theilo.
Chutiang bawkin Nutei , MLA fanu ani a atlum ber ani bawk an duat dan tur chu ka suangtuah phak bak ani ....mahse ka ngaisang hran lo mi bialpa ani tih hre reng chungin a zui daw daw zel tho alawm. Kan chhungkua hi rethei viau lo mah ila Nutei te lakah chuan khu tah khu tah kan awma ani chu a hmelṭha in an nei in a zir bawka a thawmhnaw inbel reng reng pawh thlakhat chhunga ka pa hlawh ang vel hu a in bel kim vek maithei tih ang vel ani.Chutih rual chuan Fanu duat sual tih tak ah min hmusit taka ṭawng fek fek a ching reuha Soloa hian ṭhian atan ngai mahse Nutei hi ka ring ve thlawt si lo lai tak hi kan in hauh tamna ani pakhat.
Ka pa hi Govt High school Headmaster ani a hlawh pangai tak chu a nei ve ....ka nu in engmah tih loh ai ah tiin In lamah chhang a ur ve ṭhina 'Defne Homemade' tiin kan phuah ve nghe nghe . Unau hi pathum chauh kan ni a kan upa ber U Rinhlui hi Private school ah a thawk ve a , a hlawh a bei tham êm vangin tumahin kan chuh pui ngai lem lo ka u chiah Joela ve thung hi chu kawmawh bawl chiang ani ve thunga Higher a kal tirhin ka pa hnenah Bike a dila ka pa in phal takin alo lei saka alawm ve khawp maia mahse a lawm mah mah deuh nge ni zan rei tak tak thleng a lâwm ta ṭhina inah a awm khât viau bawk.
Kan college ban chuan u Joelan min lo hruaia phun nuah nuah chungin
"lo kal vat ta che Chhechiang" ring zet hian alo tia ka ṭhiante mai bakah kan hnaia lo kal te ho nen kan en ṭhapa min lo la hui zeuh zeuh leh nghala ka va tlan pheia "tikhan min ti tawh suh ...." melh kha kha paha ka tih chuan tûm bur chungin "i ṭhiante rualin haw ve tawh rawh.... tun kum chu ka hruai mai mak tawh lo ang che" atih chuan ka nui tet tet a "khalh mai mai teh....tun kum chhung zawng leh nakkum February thla vel thleng chu min lo lam ziah ala ngai dawn" nui ruh ruh hian ka ti a phun hlut chungin a kan tlan chhuaka.
In ka thlen chuan ka nu nau chiah Nute Ruati alo lenga ka nu chuan Chhang alo ur leh chem chem tawh Roomah ka chho va u Joela chu in kawt thleng min thlaha vengthlang lamah a liam thla leh nghal.
Ka inbual zawh chuan in hnuaiah ka chhuka Nutei erawh alo awm tawhlo choka ah ka lut thei nghal zata lut phei han ti ila Sitting Room aṭangin a lang tlang vek tho tlemin a lut deuh a ani mai. Chair chu pawt chhuakin ka nu bulah chuan ka ṭhu a
"tu te ta tur nge" tih pah chuan Donut ho chu Bawmah ka lo khung ve a "Chaltlang ah .....va pe lawk rawh aw...Joela awm si lo" ati a "aw...mahse Petrol a awm leh awm loh ka va en lawk" tiin kan Garage lian vak lo lam ah chuan ka chhuak pheia tum khat chu a lo la awm ve va va mai.
Inchhung ka luh leh chuan ka nu in "Diet pengah aw i hmu mai ang " alo ti a "engtin nge ka hmuh ringawt a nga...." ka tih hlar chuan alo nui ruh ruh a ...chhan siam hi a tui chilh em a nin thu vawikhat mah ala sawi ngailo "Nimin tlaia kan pekna te inchungah khan" alo tih leh chuan "ti tal khan sawi tur lawm hre mai ang han intih ringawt" tiin chahbi chu ka la a ka nui ve tho bawk .
Scooty ka tih nun hlarh hlarh lai chuan Zautei alo lang hlawla "khawi ah nge i kal dawn" alo ti haw a "hei Pek lawk a ngai " tih pahin Bawm chu ka kawka "hmm..Sir Remtluanga te in ah kal kan ngaih kha Maka" atih chuan ka hrechhuak ve chiah
"ehee..nitak " tiin ka nui haka "khawi ah nge i pek dawn reng reng" atih leh chuan
ka pekna hmuh tur ka sawia ."I pek pahin kal ila ani mai alawm ṭhuampui ah an awma " alo tih leh tak ah chuan a rem phian ang let leha kal leh vel kha ka peih tawh lo. Ka hnungah Zautein ka phura kan thil Deliver tur a pawm bawk
"i khalh thiam tawh reng sia ....tinge i u ilo in hruai tir ve ziaha" hnung lam aṭang chuan ati lang langa .
"Ka pa in hna kal nan a hmang ṭhin alawm vawiin chu a tlan ni ani lova ....lawkin Lalzaute Scooty hi a tlan ni ani lo niaa" ka ti chûla ka hnunga mi chuan ka darah min lo chum dat data "ṭhinga...! Trafiic Police in min man a nge aw!" ati a chu chu lawm kei pawhin ka hlauh. Ka hnunga mi chuan a khat tawkin Min kan veih chuan Pawisa ka chawi ve dawn miah lo ania" atih lo leh "min man vel a nge aw" ati thul sap ṭawng takin min ti Panic zo vek
"Donut leh Cake hi Chatlangah dah phawt ila chuan muang changin kan tlan thla dawn nia" ka tih chuan a phun hlak hlaka
Kawna Chanmari kawna Traffic Police chu kan paltlang thei hrama hlawhtling in ti zetin kan tlan chho vawk vawka . Diet penga kan thil ken ha han phek hnu ah ip ru ṭeuh chungin kan tlang thla a Traffic alo Jam nasa bawk si a ka thin chu phu rang zeih zeih tak ani "a Jam nasa bawk si...min hmu man ngei ngei ang" Zautein alo ti leh et et tawha "lo en deuh zeuh zeuh mai rawh min hmu hman lo ang" tiin ka lo hnem leh ṭhina Traffic Police pathum lai an lo la awm zui bawk nen thinphu dêp dêp chungin kan tlan pel a , kan khalh chak ve deuh hlek ti ah Whistle alo ri tuara ka phu chiang lutuk chu ka break nghal vata .
Mahse Police lo ni lo in Tlema mi ang pha zânlo Traffic Police anga lo in chei hi ania
ka thaw huai thei alawm ka hnunga mi pawh chu a thaw halh mai. Lungmuang deuh chuan kan tlan zela Sir Remtluanga te veng kan thlen chuan kan zawng chawp leh te te a . A tawp a tawpah kan zawng hmu ve thei hrâma kan han luh chuan nutling pakhatin min lo chhâwna anupui anih mai hmel . "In sir chu a inbual a ..lo ṭhu ru thingpui ka lo lum ang che u " tiin a nui sang renga Sir nupui chu alo ni tak tak bawk an in neih cham Vawi 20na anih thu te a sawia a ti ti siam siam renga kawm a nawm hmel khawp mai mi fel ve tak anih kan ring nghal ringawt a .
Kan haw leh lam chuan khua ni a tla lek lek tawha Traffic a Jam nasa bawk si nen Bawngkawn sh bawk kan tang leh tawh . Mahse khua a thim ṭan deuh tawh avangin ks hlauthawng vak tawhlo . Chutia Jam a kan tan lai chuan kan piah lawk Car chhunga Soloa leh Nutei lo ṭhu chu ka hmu a ka ṭhiannu ka hrilh chuan a thinrim ve tih ka hria mahse min hmu lo law law se ka ti. An in huat hmel vak bawk si lo a Buai deuh ang hian a insawi ziaha ka rilru alo na veng veng mai. In ka thlen chuan Zautei a phun hlak hlaka ṭhen daih turin min ti leh tawh
"tihian ka be lo char char ang" ka tih chuan "ṭhen rawh ṭhen rawh" alo ti hlara za vak lo in ka nui ta ringawta .
Chaw ei ve nghal turin ka sawma min hnial ve deuh tlat a an inthleng ka han thlah leh hnu ah inchhungah ka lut ta chauha Kan in hlat hran lo a Minute 5 kal vel bak ani.
Ka nu pawisa vel ka pek hnu ah Room ah ka chho a ....Room hi a hmingin ka nei ve ani maia U Joela nen kan in sem ti ila adik ang chu . U Rinhlui chu tlema Senior lam hnaih tawh anih avangin Room lian ber kan kian . Phone ka en chuan Dar 6 ari tawha Soloa hnen aṭangin engmah ka la dawng lo . Khumah chuan zangthal zawngin ka mu thla hnawka ka kut ka hlam phei duaia inchung chu ka en tlawk tlawka thil dang daih ka ngaihtuah thung.Ka phone lo vibrate cher cher chu ka en a .
'Solo La lawma' tih hi ni a ner nang nang pahin ka chhanga ,la lawma tia ka save chhan pawh hi a tawpa 'i' tih awm tawh phawt chu ṭha deuha a chhân vek ṭhin vang ani . "Enge itih" alo tih chuan "enge ka tih loh" tiin ka lo chhanga anui vel te chu ka ngei hlur mai. "Chaw in ei tawh em nih" atih chuan "eilo" tih zawngin ka chhanga
"hmmm....enge ni leh ta" atia "enge...in ei tawh zawk em nge Nutei nen in awm dun leh mekss" ka tih chuan ka hmu tih a hriat thiam nghal mai ka ring "Falkland ah Ka pa in Ram min en tira ka haw lamin Bawngkawn ah ka hmua alo chuang haw anih kha" alo tih chuan a hmuh loh lamah chunglam ka meh kual ralha "e....in va in tawng fuh thei chat chat ve " ngei awm rawng kai lek lek a ka tih chuan a thaw deuh halhin ka hria.
"Defne i duh chuan min ringla ....i duh chuan min ringlo thei tho bawk...chaw in la ei loh chuan tui deuhin i ei dawn nia kan in bual ve lawk a nge" atia Call chu a hmet tawp zui hmak a . Ka tho chhuak hluaia chutia Call a dah hmak chu ka ngei tawk a tling khawp ka sa up up thei hial a lawm le.
Ka nu in chaw ei turin min lo au lâng lânga phur lo zetin chaw chu ka ei a . U Rinhluin Joela awmdan a sawisela pakhat lahin alo hnial ve zel bawk a "hna zawng rawh chawm hlawm nih reng a zahthlak" u Rinhlui chuan a ti fak fak a "nanga hlawh chhe te nei in ka Chapo te itih ve le....hna nei lo pawh ni ila nang angin ka chapo ve lo " pakhat lah chuan alo ti ve hmak hmak bawka . Chaw ei tui lo zual ṭhakin an in hniala ka pa in alo hauh takah chuan an rej ve thei hrâm ani . U Rinhlui leh Joela hi chu Ui leh Kel thlun pawlh ang hlauh rei lo te pawh an awmdun chuan Wolrd War 3 indo pui pathumna a chhuak ani nghal zel.
Ka pa in "Defne i chaw ei a tui vak na nge" alo tih chuan "tui e.." ka ti ve maia ....min chhang zui lem hlei lova .
Chaw ei khamah Sitting room ah rei lo te ka ṭhu phei a ka nu ke hmeh pah chuan Kan College chungchang ka sawi puia
Vawiin tlaia kan Scooty khalh Traffic Police kan bum dan ka sawi chuan ka pa alo in rawlh nghal zat mai "vawi khat mah tlan loh ni ah kalh chhuak tawh reng reng suh u....in huai pap pap lutuk a ahh..." atia a hui vak vaka ava han chauh hmel thei tak ka nu erawh alo nui kur kur a . Joela Inchung aṭang a lo chhuk chu a bike chahbi ti vir pap pap in alo fekfuk thla a ..a kekawr ip te a kut pakhatin a zen ṭat bawka . "Kha Bawiha khawi ah nge i kal dawn" ka pa in a tih chuan kan lam ah alo pheia ka pa bulah ṭhu in "Khawi ah mahh" tiin a nui a ava han chhen sêng sûng tak .
"I chahbi vai vir pap pap kha ka hmu pap pap ania" ka pa in atih chuan pakhat zawk chu pawi tih hmel zet hian a chal a ti chuar nanga "Aw...!!! i chawngkawr mit khan min lo hmu leh hman tawh elaw" atih chuan ka nu nen kan lo nui haka ."Enga chawngkawr mit a!!?" ka pa in a tih vin ṭhat lai chuan "aw......i mit kha Chawkawrrr" tiin Ka pa mit zawnah a kut pahnihin a mit nen a kawk tawn zak zak a "aa...khaih ka mit i hawlh dawn alawm leu luau " tiin ka pa chu a tawlh pheia ka nu in "Joel Leng suh ang che Nizan ah Pu Zalawra te ar leh kan Zo ar in lo in sual tir leh tawh ani maw......nâu hruai lai ani leh nghal ti tawh miah suh" atih chuan "Chuvang ani maw ...ka man dawnin min lim ka ti reng ah " Joel an alo ti a " tcchh tchh tlangval a pumpa arpui te han in lim tir pa lo e..." tia ka lo nui hak chu thip zet hian min lo melha "Ve che..arsa i duh duh nen Man pawh i man ngam loh kha aw....Arpui in min lo in ka u Rinhlu in... a mi min lim dawn" Nui miah lo a alo tih chuan "Lalchhuanawm ka lim tak tak mai ang che aw...min hmer tel ve ziah suh" U Rinhluin alo ti hlara kan lo nui ruh ruh a . Pakhat zawk hian chheih thinrim dan tâwk hi a hre ṭhin bawk si a an in haw tak tak chuang miah lo .
"Chhe chiang " ti a Joel an alo tih chuan
"Pa....Joela hian Chhe chiang min ti ziah ania aw....College ah ti hian min ko ziah ring tawk tawkin" tia ka pa ka hrilh chuan
"Joeal ti tawh suh ..a ṭhat buang buang êm hi" ka pa chuan a ti a anui insum chu ka hmu reng U Joela leh ka pa in en paha an nuih hawk hawk chuan ka nu chu ngenngawl takin ka melh a ani pawh nuih a insum ve tho "Awi....nui ru ah..ka mu daih dawn tikhan min nuih zat ula..enge k hmingah Ṭhachiangi te intih " tiin inchung kai lawn ah chuan insawh tau nghawng nghawngin ka chho a . Room a ka luh chuan khum ah ka ṭhu a phone ka en chuan Soloan min lo la be leh lo , rei lo te lehkha ka zir a Dar 9 arik thleng chuan pohne Call leh Message Soloa hnen aṭangin ka la dawng miah lo a ka thinrim leh ṭun tawh.
Veranda thlang lamah ka zuk chhuak thla a u Joela Room chu alo thim ṭhiap mai a leng leh tawh nih ka ring kan room hi a in ping dang tak nain Veranda kan inṭawma a zau vak lo na in zim lutuk ani hran lo . Boruak ṭha ka zuk hip vang vanga Arsi chu an lang thei che che chauh ani Thil eng dang a tam lutuka chiang tak pawhin ka hmu theilo thla erawh a eng bial kulh thung. Dawkana ka phone dah lo nghawr dat dat ka hmuh chuan ka lut a Soloa anih tawh ngei ka rin laiin number hlang alo ni a "Hello " alo tih chuan Mipa chu ania mahse ka la hriat ngai ani lo "Tunge aw" ti a ka ngaihthlak reng lai chuan thawm a ri nasa a, zai lâng lâng ri te pawh ka hria .
Thawm chu a ri zui rak rak a tlem chuan a reh ta deuh "tunge inih" ka tih leh chuan
"awhh....hehhh...Joela nau Defne i maw" alo ti a aṭawng dan phel phual chu zu rui mai mai in min lo bawl anih hmel
ka aw ti danglamin "tunge inih a Vala" ka ti a "Christo ....in College ah ka lo lut dawna Topper maw inih" atih chuan "chuang enge" ka lo ti chang deuh faka "ṭhianten hei..kan class Topper an ti che a ..naktuk ah kan in hmu nia nih phawt aw...Defne" atia adah daih . Tu mi mawl in nge min lo bawl chu ti rilru neuh neuhin tukverk chu ka kalh a Parda ka tih thlak hnu ah khum lam ka pana ka tukhumin lukham a sik rualin ka chhing vang vang a . Mitthla ah Vawiin tlaia Soloa leh Nutei te ka hmu a , ka tan Nutei chu han cho rual ani bawk si lo a rilru a hah ve duh khawp mai.
Zing ka thawh chuan ka nu rawngbawl ka zuk puia u Rinhlui chu alo in siam peih leh at tawh "chaw i ei dawn em Hluhlu" ti a ka nu in a zawh chuan a ei tur thu in alo chhanga "Chawhma class in nei lo mi" tiin U Rinhlui chu Chair pawh sawn pahin alo ṭhu a lu ka lo bu nghat a ka nu a thil chhuan chawk tura a thawh lai chuan
zawi deuh tak hian "nimin tlai ah i bialpa leh hmeichhe dang ka hmu leh tawh ania" ati a . "Ṭhen la itih fuh zawk ka ring...." atih leh chuan "ka hrelo le ....mhse...ka tum ve ṭhin" tiin ka chhanga URinhlui hi mi ṭawng tam lo ani a ....a zahawm thlap mai bawk si a unau ro ro a pawh mize in ang lo tak kan ni.
Chawhnu lamah U Joela peih lo chung chungin ka in thlah tir leh tawha phun hlak hlak chungin min phur thleng ve leh zak tho zel .... "tlai ah ka lo lam hman dawn lo che nia....siam tir ka ngai" tiin a Bike Tanki chu a beng dat dat a "i daw e....ar sual huai lei in tum anih kha Nichin a i ṭhianpa nen in in be lai ka hre vek aw" ka tih kha kha chuan "Anu bulah han sawi veih teh" tiin a kut zung chal chuan a nghawng zawnah a thai pheia hmui ti sawi nang nangin ka kal sana ani pawh a in khalh haw ve leh nghal maia .
Class a ka va luh chuan an lo ri deuh laih laih tawha Zautein ka hmel a hmuh chuan ka bulah alo kal hnai in ka banah min pawt phei nghala "ilo hre ve tawh em" atih chuan "eng maw" tiin ka lo chhanga "awi ila hrelo anih hi" tih chiahin min chhanga enge ka hriatloh ka zawh leh pawh chuan a sawi leh duh chuang miah lo he nu hi chu ah.
Class kan ṭan hma hret chuan Petera te ṭhian ho an lo lut a thawm a reh nghal dâwk mai an ni ṭhian ho hi kan Batch a in ang veka an in la Gang ve deuh emaw ni tunlai deuha in chei ṭhin e tilo hian insual te an hrat ṭhina an beih awm tawk tete ho ten an pawi an sawi deuh chuan zirtirna an pe hlak ṭhin . "Defne.....World Bank road ah tlai ah chuan i u chu kan lo nghak mai ang aw" Petera chuan alo ti a . Ka u ṭhiante ni e....an in kawm ngaih mahse an sual
"hei hi maw Defnei chu " lo ti tu chu ka en a ka la hmuh ngai loh ani "aw...Kan class Topper anih hi Joela nau " Petera bawk chuan ati a chupa chu lo insawn tur an sawi kha anih mai hmel .
Petera te nen an in kawm nghal chawt anih chuan a fel vak lo tihna ani mai "Christo " tiin a kut alo phar a chibai tuma ka kut ka phar chhuah ve chuan "oh...kan in hriat hunah kan la in chibai dawn ania" atia ka ṭhutna zawn deuh chiah ah chuan a ṭhu a Petera te ho an lo nuih ṭiah ṭiah lai chuan a awm dan chu ka ngei zawng tak ani.
Dar 3 velah class kan banga Zautein "lo lut thar pa kha..ava zia reuh ve" atih chuan
ka chhang lem lo chutiang zawngin ka lo la lo hrim hrim a mize ngeng hmel lutuk leh a mit meng rum deuh ûl chiah kha ka hmuh awm chhun ani "a sang ṭha bawk sia...a Sana kha ka duh tawp" Puipuiin alo tih chuan "in van lo en chik awm êm êm" ka lo ti a "ahhh..a Sana leh a pheikhawk kha a ori anih kha aw......an hausa niang a hmelpawh a chhelo" Zautein uar deuh taka atih chuan Puipuii nen an sawi chhun zawma kei a theng a thawng ah mah a luh loh laiin an mipa duh zawng hi a mak thei ania mipa awm ṭha duh lo deuh te leh Zu in thei ve te hi an duh daih zela kei chuan Zu in ngai lo tawp ka duh a in thei ve pawh ka duhlo inlo tawp se ka duh .
U Joela chu a sawi ang ngeiin alo lang miah lo a ka ṭhiante pahnih in Bazar an tum avangin kan haw rual lo Bus stand lama ka phei lai chuan Peter an hnung lam aṭangin min lo au lauh a "Defne ka lo thlah ang che in veng lamah ka phei dawn tho a" alo ti a , a bulah lut thar pa kha alo ding ve reng bawk . "A pawi miah lo....mahse enge in tih dawn" ti a Petera ka zawh chuan
a bula ding pa chuan "in ti suh i tirawh ka kal ve dawnlo" alo ti nghut a awi min melh dan chu ah ....min haw ngawih ngawih hmel te a pu alawm kan vawikhat inhmuh na chauh ani sia Peter an "a mizia ve ania ngatan mah ngai suh ...vai Ram a a awmdan anih hi" atih chuan ka chhang lem lo. Christo tih kha a hming ani a ahming nalh teh lul nen ring deuh deuh a Bike khalh ṭhin ve tho anih ka ring .
Peter an kan in thleng min thlah a alo lut kawia U Joela chu ka nu in Misson veng ah a kal thu alo sawia Petera chuan a tukhum hiat thuakin a chhuak ve leh mai pawnah a chhuak chiah tih ah pawn aṭang chuan min lo ko a "i u chu Ar a lam dawn ami le" zawi te hian a ti sar sar a nitak zingah khan ar sual huai lei tih vel phone call kha a hmang tak "aw....nangmah ani lo mi zingah a call kha " ka tih chuan lu a thing ne ne a "Christa kha Mission vengah chuan a kal ve dawna an zuk la dawn aniang " atih chuan hrethiam lo deuhin ka melha "kha pa kha ka hmuh âwm ka la hrelo reng reng khawi veng nge" ka tih chuan an veng awmna a sawia Soloa te veng ami alo ni a .
Ka inbual zawh chuan Solo an min lo Call ve chiaha "Vawiin tlai chu chaw lo ei tawh la Ka nau alo haw a .nizan khan alo thlenga " zangkhai vah a alo tih chuan
"eee....alo haw tawh maw" tiin ka chhang ve maia "umm..ka lo lam dawn che em ni ang ....ka nu te pawn lo hruai rawh an tia" a tih leh chuan hreh deuh chungin ka remti ve hrama anu te hian ṭhian kan ni tih hre mahse inngaizawng kan ni tih an hriatna ala rei lo a tlem chuan ka hmu hreh ve deuh . "Nu ....Soloa te in ah Zan riah ka ei dawn asin" ti pah chuan Choka lamah ka phei a "an sawm che mi" alo tih chuan ka bu nghat a "Alo hruai dawn che chuan i duh leh ei phei la " a ti a Ka nu hi chuan engmah Soloa nena kan inkar a sawi ve ngai lem lo U Rinhlui ber hian min duh pui lo a .
Dar 5 velah Soloa alo thlenga ka nu leh pa te nen an in be zui luama , Motor a kan luh dawn lai chuan Joela alo haw ve chiah nia ...."nangkha khawi ah nge i kal a " ka lo ti kha kha a min melh râm râm pah hian
"en la " tiin pawisa tam tham deuh hi alo keng langa amah ka en leh chuan inti thei deuh in mit ko alo san ak ak a "ehee khawi a mi nge" ka lo tih chuan "Ka den alawm" atia inchhungah a lut daiha Soloa ka en chuan alo nui tet tet a Seat a ṭhut luh pah chuan "Ar sual huai an in sual tirna a niang" ka ti a "aniang a hlawk alawm van neih chuan " a ti ve maia . Soloa te in kan thlen chuan tum loh deuh in Christoa kha ka hmu a "nang hi" ti a melh chuan mit ko a san deuh uk ringawt a Soloa ka zui ve zela anu leh pa te Chibai ka va bûk ve luam hnu ah Ṭhut khawmna lamah kan pheia ka hmuh duh loh deuh mai ka hmu chu ka ding dat a "Defne ilo kal ve law" ti tu chu Nutei ani za vak lo a nuih pah chuan ka bu zeuh ringawta .
Sofa ah chuan ṭhu in mi lo kal ve dang ho chu an ti ti malh malh renga kei chu ah nuam pawh ka ti lo rin ai an tama Nutei nu leh pa te pawh ka hmu "Solo bathroom ah ka kal duh" tiin Soloa beng bulah ka hrilh ru a Solo an a room bathroom hmang mai tura min hrilh hnu ah a room lam panin ka chho a midang ho chuan min en zui lem lo an buai buai in an buaia . Soloa Room ka lut tur chiah chu "Nge hetah i tih ve a Topper" tih ri lam chu ka hawi a kha pa kha room pakhat kawngkhar bulah kut kuang kuah chung min lo melh rân mai .
"Enge itih ve zawk min zui ru ami" ka tih chuan za lo deuh hian a nui haka ka lamah lo kal hnai in hnai set sawt ah min en chhuk râna amah a sang ṭha bawk si a zam bik map lo a ka en ve ngal lai chuan
"kan in anih hi"ati bung nghuta anih chuan ani hi Soloa nau chu maw....!!!
"Soloa nau chu maw inih" mak tih hmel zeta ka tih chuan a tawlh hnung hret a ala kuang kuah reng thung rum deuh taka min melh chung hian "i hmelṭha teuh" ati a min melh rum ka ti dawn nge a men dan ve hrim hrim ani pawh ka hre nek lo e
ner khum nang chung hian "nih chu ah" tiin ka luh san daiha a ṭawng bul ve khawp mai ti rilru neuh neuh chung chuang bathroom ah ka luta Ka chhuk thlak leh chuan Nutei leh Soloa lo in ṭhu hnaih lutuk chu ka va hmua Nutei chuan a ei lo chauh ni mai hian ka hria aw ka thian kharha Soloa chuan min lo pan nghal thuaia "i ril a ṭam tawh em" tia min zawh lai chuan kan piah lama Christoa ṭhu chu a lo nui haka ka va melh zawk hnu ah
"ṭam lo e " tiin ka chhanga rei pawh ka ṭhu hman lo ang ti ah Nutei chu a au chiam a Ṭhut khawmna pin dana awm ho chuan kan lo en ṭhapa
"awi....Solo la sawn teh .....la sawn vat rawh" tiin Soloa awm ah chuan a biru ka ti mai a kuah châwt châwt a Soloa chuan
"khau hi maw" tiin Nutei mala khau lo fuh chu a lak saka . Ava han inti no tak khau mai mai lo hlauh te chu ah za vak lo hian ka lo nui haka Nutei chuan mit meng thip zeta min lo melh pah hian "ilo nui vel alaw" alo ti kha kha a lu thing vut pah hian "nui lo e " ka ti ṭha maia chutah Nutei chu ding hluai in "min nuih zat ve khanglang tih na em ni nangkhan" tiin min kawk sawk sawk ta maia nasa tih hmel zeta ka en lai chuan Soloa chuan ṭhu turin a hrilha chu nu chu ala duh tawk lo ani mahna min kawk sawk sawk pah hian "engmah ni hlei lo khan kei hi min nuih ve khang lang a maw....heta ṭang hian chhuak rawh..mi hausa awm khawmna ah hian enge ilo tih ve " atih lai chuan ka na veng veng mai Soloa chuan kai in a kal chhuah pui dawr dawra
Ka piah lawka ṭhu pa Christoa khan min lo melh rân a ka zak lutuk ṭah chhuak bawk si chu ka in hum ruh nasa khawp mai
Soloa lo let leh chuan "enga tan mah ngai suh ...ani thu sawi chu" tiin min hnema ve tak na in ka nat tur ang a dawn pha lo nge ni chuti maia enga tan mah ngailo tura min ti chu ka thinrim ṭun thei .
Chaw kan ei lai pawh chuan ka ei tui awm pawhin ka hrelo Soloa chuan ka kut ah alo hum leh vang vang ṭhina za vak lo hian ka nui leh ringawt zel .Hetiang teh hrep hian Nutein min hmusit dawn tih hria ila ka kal lo chiang viau ang . Kha ti khawp khan mi zawng zawng hma ah min an khuma chu pawh ka bialpa te in ah ngei leh nghal chal tlai tak a min kawk sawk sawk ngam te kha ka la tawn ngai lo an ni na ka ti takzet bawk.
CONT-
Comments
Post a Comment